ईश्वर - पूजन

संतांच्या विभूती , जगाच्या कल्याणा

अवतार घेती , देतात प्रेरणा ||

लोकांच्या उद्धारा , जीवन साधना

देव शक्ती देतो , करता प्रार्थना || १ ||

ईश्वराच्या साठी , जीव तळमळे

दु:खिता पाहुनी , मन कळवळे ||

ईश्वर दर्शन , हाच एक ध्यास

सत्य त्यास कळे , लोपतसे भास || २ ||

एक ज्यास भूक , एकच तहान

थेंब अमृताचा , करितो पावन ||

भेटताच देव , नुरे देहभान 

ईश्वराचे प्रेम , नलगे साधन || ३ ||

भेटे माणसात , ज्याला भगवंत

तोच भाग्यवंत , आणि साधुसंत ||

शरण मनात , प्रेमभाव आर्त

मूर्ती लागतात , पूजण्या अमूर्त || ४ ||

भारावते मन , मस्तक लवते

कंठही दाटतो , हृदय द्रवते ||

स्वप्न जीवनाचे , जेंव्हा सत्य होते

दिव्य तोच क्षण , दैवत लाभते || ५ ||

बोलणे अमृत , ज्ञानाचेच सार

प्रेमाचा वर्षाव , नसे अहंकार ||

मूर्तीमंत प्रेम , दयेचा सागर

प्रगट रुपात , तो परमेश्वर || ६ ||

आचार-विचार , आदर्श प्रेरक

तेजस्वी स्वरूप , तो मार्गदर्शक ||

आदर,सेवेचा , करता स्वीकार

जन्मोजन्मी ऋण , नाही फिटणार || ७ ||

पाहताच वाटे , जावे त्या शरण

विनम्र मनाने , द्यावे पंचप्राण ||

त्याच्याच रुपात , असे भगवंत

प्रचिती मिळते , माध्यम दैवत || ८ ||

त्याच्या दर्शनात , आनंद अपार

त्याच्या असण्यात , अस्तीत्व आधार ||

लाभताच दृष्टी , देव दिसे सृष्टी

त्याची कृपादृष्टी , अमृताची वृष्टी || ९ ||

अनुभवामृत , प्रत्यक्ष प्रमाण

सत्यसाक्षात्कार , देवाचं भेटण ||

व्याकुळता प्राण , लाभते दर्शन

परिसाचा स्पर्श , जीवनाच सोन || १० ||

मन मंदिरात , दैवत पूजन

श्रद्धा नि सबूरी , देता त्यास दान ||

करितो सांभाळ , सद्गुरू प्रेमळ

तर्क,वाद थांबे , मन हो निर्मळ || ११ ||

करायचे काही , राहतच नाही

मागावेसे काही , वाटतच नाही ||

मिळायचे काही , उरतच नाही

त्यास मन वाही , दुजे रूप नाही || १२ ||

क्षणोक्षणी भेटे , ईश्वर साकार

आनंदच वाटे , सृष्टी चराचर ||

अंतर्बाह्य दाटे , आगळा प्रकाश

नूरे भेद कोठे , धरती आकाश || १३ ||

चांदण्याची वर्षा , ओले चिंब मन

चित्तही प्रसन्न , तन मन धन ||

दैवता अर्पून , सुख समाधान

शांती लाभे तेच , ईश्वर पूजन || १४ ||

३०.०४.१९८४ - ०१.०५.१९८४